1
Hug dulce nomen, Hug propago nobilis
Karli potentis ac sereni principis,
insons sub armis tam repente soncius
occubuisti!
2
Sed cur adire Karolum presumeres,
quem Hludouicus, imperator inclitus,
regem libenter uisus est ex filio
constituisse?
3
Sed non ob hoc tu perforandus lanceis,
nec membra tua lanianda fuerant,
cum plus prodesse quam nocere cuique
semper amares.
4
Nam rex Pipinus lacrimasse dicitur,
cum te uidisset ullis absque uestibus
nudum iacere turpiter in medio
puluere campi.
5
Quin immo de te subsecutus addidit:
«Hunc si uidissem sospitem nunc corpore
talenta centum non placerent aurea
hoc michi quantum!
6
Karroff oneste collocetur tumulo,
de quo sacerdos extitit ac monachus,
et ubi uiuens postulauit mortuum
se sepeliri».
7
O quam uenustam quamque pulcram speciem
circumferebas omnibus pre ceteris,
cum plus prodesse quam nocere cuique
semper amares.
8
Non crimen ullum, non rapinam quamlibet
tu perpetrasses, cum fores mitissimus,
cum plus prodesse quam nocere cuique
semper amares.
Pa = Paris, BNF, lat. 1154, ff. 133rb-134ra
Stotz
Titulus: PLACTUS UGONIS ABBATIS.